Trainingslager St. Moritz vom 10. bis 22. Juli 2023
12.07.2023
Trainingslager St. Moritz vom 10. bis 22. Juli 2023
***
Montag, 10. Juli 2023
Programm:
Anreise / Mittagessen in der Jugi / Zimmer beziehen / Training: Einlaufen/Dehnen, Seilsprungzirkel / 10x 100m Steigerungsläufe
Angersch aus i de letschte Jahre si mir hüür nid am Sunntig iz Engadin abgreist, sondern ersch am Mäntig. Derfür si mir bereits am Morge am achti abgfahre und nacheme churze "Boxe-Stopp" bereits am 12.30 Uhr ir Jugi aacho. Zmittagässe het scho uf üs gwartet. Es het Nudle mitere Gmüessauce, Salat u zum Dessert e Donut gä. Nachem Ässe hei mir o bereits üser Zimmer chönne bezieh u no e churze Power-Nap mache, bis am vieri scho üses erschte Training isch ufem Programm gstange. Nacheme Ufwärmrundeli u chly Louf-ABC hets e Miniband-Zirkel gä u anschliessend 10x 100m Steigerigslöif. Das Training isch ratzfatz düregsi u mir si de o grad scho es erschts Mau ga kneippe. Die junge Girls heis natürlich nid chönne la si u hei grad e Schwumm im chaute Nass gmacht u ono paar Gümp vom Brüggli achegwagt. Stilnote hätt das zwar nid e gueti gä, aber das isch Näbesach gsi. Zum Znacht hets Älplermaggaroni u Öpfumues gä. Mir hei de bereits es paar Spieli gspiut u si de när o scho gly mau ga liege.
Gabi Schwarz
***
Dienstag, 11. Juli 2023
Programm:
Miniband-Zirkel, Hürden-/Lauf-ABC / Hürden / Nami frei - Baden am Lej Marsh
Am erschte offizielle Tag in St. Moritz het bi üs im Zimmer 226 dr Wecker am 7ni glüte. Da ds no viu ds früech isch, hei mer aui no e churze Powernap gnoh bis mir de öppe am 20ab langsam si ufgstange. Mir hei üs "ready" füre Tag gmacht u si de öppe uf di 10 vor 8ti zum Zmorge gange. Nachem usgsproche feine Zmorge si d'Jelena u ig no je e Massage ga gniesse ufem Mätteli. Nachdem si mir de ga d'Täsche packe u när de los ufe Sportplatz. Churz vorem Training si mir no vo Pfadi-Lüt agsproche worde u hei de när mit dene no e Tanz vorgfüehrt u ufgnoh. Pünklech am haubi 10ni het de ds Training miteme lockere Jogging chönne starte. När heimer e Miniband-Zirku gmacht. Dä isch würklech chli bissig gsi. U de simer de oscho ad Hürde gange. Ds Hürdeprogramm het gstartet miteme Hürde-ABC u de ufghört miteme 3er usem Block. Nachem Training hei mer no hurti d'Teams zoge für ds Spiuturnier. D'Fröid isch gross gsi, wo ig ha erfahre, dass ig ds Vergnüege mit dr Nadja darf ha. När simer de üses Zmittag ga ichoufe. Mir si aui no churz id Jugi zrügg, nid zletscht usem Grund, dass mir mit Blacky und em Bus hei chönne zum Lej Marsh fahre. Dr Namitag heimer aui bim Seeli verbrunge, paari lieber ufem Tüechli am sünnele u di angere im chaute, aber agnähme Wasser. Öppe am 5i simer de zrugg id Jugi gfahre u ga düschele. Am Abe göh mer de no ga Znacht ässe u düe de öppe no chli Schummel Hummel spile. :))
Valerie Lempen
***
Fotogallery 12.07.23 / Video 1 / Video 2
Mittwoch, 12. Juli 2023
Programm:
Einlaufen/Dehnen / Koordinationsleiter / Sprints / Startabläufe / Nami: Tempoläufe im Gelände
Als wir heute Morgen vom Schrecken eines Donners aufgewacht sind, haben wir uns fertig gemacht und angezogen. Um 8:00 Uhr gingen wir dann Frühstücken. Nach dem Frühstück hat das Wetter leider noch nicht viel besser ausgesehen, deshalb haben wir beschlossen, dass wir bis um 10.00 Uhr neurozentriertes Training machen. Um 10.00 Uhr haben wir uns dann auf den Weg zum Sportplatz gemacht. Als wir am da angekommen sind, stand die ganze Rundbahn unter Wasser.
Zum Einwärmen haben wir eine kleine Joggingrunde am St. Moritzersee entlang absolviert. Nachdem wir zurückgejoggt waren, ging es los mit 5x 40m steigernd. Dann folgten 4mal 5x40m-Sprints. Mit der Zeit ist auch die Sonne hinter den Wolken aufgetaucht. Nach den Sprints hatten wir noch Blockstarts. Später gingen wir das Mittagessen einkaufen. Danach gingen wir an den See und haben unser Mittagessen gegessen.
Dort haben Jelena und Valerie die Enten gefüttert. Nachdem wir fertig gegessen hatten, machten wir uns auf den Weg zurück zur Jugendherberge. Dort angekommen haben wir noch ein paar Runden Dart gespielt. Um 17.00 Uhr haben wir uns vor der Jugendherberge versammelt. Heute Nachmittag waren ebenfalls Läufe auf dem Programm. Heute Nachmittag hat Nik Lehman unser Training mitgemacht. Als wir oben angekommen sind, haben wir mit 4x100m Steigerungsläufen gestartet. Darauf folgten 6x 120m Sprints leicht fallend. Nach den Läufen sind wir zur Jugendherberge zurückgekehrt. Wir haben geduscht und uns fertiggemacht fürs Abendessen. Es hat Kartoffelstock mit Gemüse und Gulasch gegeben. Nach dem Abendessen genossen wir noch ein Dessert im Restaurant Sonne. Später gingen wir wieder in die Jugendherberge zurück und haben noch ein paar Spiele gespielt, worauf wir dann schlussendlich ins Bett gingen. Es war ein gewitterhafter, aber schöner Tag.
Alisha Schafroth
***
Donnerstag, 13. Juli 2023
Programm: Einlaufen/Dehnen, Miniband, Hochsprung, Speer. Nami frei (Badi)
Aus erschts wär hüt es Footing agstange, aber wägem schlächte Wetter isches ufene angere Tag vrschobe worde. Dr Wecker het hüt bi üs im Zimmer am 7:30 glüttet de simer ufgstange hei üs ready gmacht u si zum Zmorge gange. Dert heimer üs, wie immer, bimene feine Buffet törfe bediene. Näre hets no es paar Dartduells gä, bevor mir näre zum Trainingsplatz si gfahre. Üses Training het miteme Poweriiwerme à laa Blacky gstartet u nachem anschliessende Minibandzirkel isches de a z'Hochsprung gange. Us churzem Aalouf hei mir d'Schäri gmacht u gfloppet u nachere churze Videoanalyse simer de vom länge Alouf aglofe. Bim aschliessende Speer hei natürlech nomau aui ires bestmügleche probiert u naches paar luschtige Zwüscheüebige si de scho die abschliessende Würf mit sibe Schritte Alouf cho.
Z'druffougende Zmittag simer aui im Coop ga choufe u näre vorder Jugi ga ässe. Gly drufabe heimer üs ufe Weg i d'Badi gmacht. Für das Nami-Programm heimer üs entschiede, wüu z'Wetter nid so guet isch oder ömu sehr unsicher. Ir Badi hei Nina u Yara no müesse luege, wüu me ir Jugi, womer d'Billet hei kouft ab 15ni aus Erwachse geutet, aber ir Badi säuber ersch ab 16ni. BETRUG vor Jugi! :) Am Schluss hets d'Frou ar Kasse leider o nid chönne rückgängig mache u si hei müesse aus Erwachsnigs zahle. Es isch e fätzige Nami gsy i dere Badi u z'Rutschbahne-Renne isch 4:4 zwüsche Nadja u Valerie usgange nume ig ha immer verlore:)) D'Valerie u ig hei üs de derfür entschiede, no chli länger ir Badi z'bliibe, dass dr Bigler nid so "lost" isch;). Mir hei när leider dr fausch Bös verwütscht u si - statt i drü Minute zrügg ir Jugi - ufe Bös nach Pontresina u hocke itze grad in Pontresina am Bahnhof. Itze fahre mir de grad miter Rhätische Bahn zrügg nach St. Motitz. Wemer de wieder zrügg si, gömer de no aui zäme ga Znachtesse: es git Tortellini gfüut mit Spinat u Ricotta. Näre wird no üses Spiuturnier witergspiut, mau luege öb scho die erschte Sieger bestimmt wärde…
Jelena Schranz
Freitag, 14. Juli 2023
Programm: Seilsprungzirkel/Lauf-ABC / Sprungschule / Hochsprung / Nami: Medizinball / Staffeltraining
Hüt Morgä het bi üs dr Wecker scho früech glütä. So hei mir üs ufä Wäg a Stazersee gmacht, zum ga nä chüelä Morgäschwumm znä. Zrugg ir Jugi hei mir Zmorgä gässe u üs uf z'erschtä Training vo hüt vorbereitet. Eigentläch wär hüt Witsprung ufem Programm gsi, aber wäg dä Bouarbeite hei mir das dür Hochsprung ersetzt. Bevor mir aber hei aagfangä, hets no ä Seilsprungzirku zum Iiwermä gä. D'Mittagspousä isch o gäbig verbi gangä: äs paar hei no ä Powernap gno oder angeri si ga Bös fahrä. Am 4i isch när no Medizinbau u Stafflä ufem Plan gsi. Natürläch simer när no schnäu ga kneippä u när uf di 7ni zum Znacht, wo sich aui scho sehr hei gefröit, wius Chili con Carne het gä. Di letschtä Stung vo däm Tag hei mir gmüetläch la dürä zieh mit Spieli umene Spaziergang.
Fabienne Flükiger
***
Samstag, 15. Juli 2023
Programm: Tempoläufe auf der Finnenbahn Corviglia
Am Morge si mir aui gmüetlech am Zmörgele gsi, wo plötzlech öpper so seit: "Was isch de da passiert?“ Mir hei aui ufe gluegt und hei gseh, dass es ar Decki e grosse Fläck het. Dä Fläck het schlussändlech derzue gfüehrt, dases vo obe abe tropfet het. Nach däm spezielle Start i Tag isches de oscho los gange ufe Bös zur Corvigliabahn für ufe uf Corviglia. Wie immer hei mir zersch mau es Rundeli ume See gmacht zum Iiwerme, was me o ni darf vergässe si fotos z'mache. Auso hei mir mau es paar gmacht. Nach dr Fotosession si mir när zu de Löif cho. Wo mir när d'Löif hei düre gha, si mir när no ufe Piz Nair mit dr Gondle. Nach däm mir wieder bir Jugi si gsi, hei mir churz üses Bikini agleit, es Tüechli gno und si ab ufe Bös Richtig Sportplatz abe. Dert si mir när no ga bade und hei dr Final vo dr 4x100m-Staffle gluegt. Zum Abschluss vom Tag hets zersch Spaghetti gä und abschliessend si mir no ufe Muottas Muragl gange. Dert hets no es paar schöni Fotos gä und mir hei no üsi Neuroathletics-Challenge ufgno (isch ni perfekt gsi, aber luschtig :)). Und nach däm Usflug si mir no id Sunne e Glace ga ässe.
Nina Lempen
Sonntag, 16. Juli 2023
Programm: Miniband / Hürden-ABC / Hürden / Nami: frei
Heute Morgen sind wir um 7.30 Uhr aufgestanden und haben uns fürs Frühstück angezogen. Nach dem Frühstück gingen wir uns frisieren und fertig machen fürs Training. Heute haben wir zum Einlaufen mit Lauf-ABC angefangen und dann stand Hürden-ABC auf dem Plan. Nach dem Hürden-ABC haben wir Hürden gemacht. Am Mittag gingen wir an den St. Moritzersee. Später gingen wir Marina, die neu dazu gekommen ist, herzlich empfangen. Wir haben ihr das Zimmer gezeigt und haben danach die Sachen gepackt für an den Stazersee. Danach haben wir noch Fabienne und Jelena verabschiedet und sind dann losgefahren.
Als wir dort angekommen sind, hat es fest gewindet. Wir haben auf dem Steg unsere Tücher ausgebreitet und sind schwimmen gegangen. Das Wasser war ein bisschen kalt. Später kamen noch Gabi, Blacky, Ueli, Margit, Lia und Emily dazu. Später sind wir dann wieder zurück in die Jugendherberge gefahren. Nachdem wir dann schlussendlich nicht in der Jugendherberge geduscht haben, gingen wir zum Abendessen. Es hat Safran-Risotto mit Truthahn und Gemüse gegeben. Zum Dessert gab es eine Karamellcreme. Danach haben wir noch Spiele gespielt und sind dann auch nach nicht allzu langer Zeit mal ins Bett gegangen und haben geschlafen. Es war ein schöner Tag.
Alisha Schafroth
***
Montag, 17. Juli 2023
Programm: Seilsprungzirkel, Hochsprung, Sprints / Nami: Medizinball, Speer, Kugel
Hüt am Morge het üse Wecker wie immer am haubi achti glüttä. So wie no jede Morge isch d'Yara die erschti gsi, wo usem Bett isch cho, churz speter d‘Nina u nach zwöi Schlummertön de o mau d‘Marina und ig. Nachem parat mache, simer ga zmörgele. Mitem voue Buch hets när o scho gli ä erschti Dartrundi gäge Blacky gä. Wüu är ir erschte Wuche chli unge düre het müesse mit sine Niederlage, ha ig ihn du hüt la gwinne (är het aber souverän gwunne, ig bi äuä no chli z'müed gsi) :). Am haubi Zähni isches när is erschte Training gange. Aagfange hei mir mitem Iiloufe, gfougt vomne Seilisprungzirku. Nachem iirwerme isches a z'Hochsprung gange. Nach paarne Sprüng hei mir när dörfe Löif mache. Ufem Programm si 2x 5x70m gschtange. Zum Schluss no paar Diagonallöif u när si mir o scho ga kneippe. Ds Wasser isch aagnähm gsi u d‘Fischli si wie gewohnt ade Füess cho knäbberle. (Emily het das nid so luschtig gfunge). Zmittag hei mir am St. Motitz-See gnosse, ä Teu aber im Schatte, wüusi sich am Vortag ir bränntende Sunne hei verbrönnt. Churz drufabe het üses Zimmer du äs Mittagsschläfli gnosse oder amne spanndende Buech witergläse. Zit isch so schnäu verbi gange, dass mir scho wieder is Training si gange.
Am Vieri het die zwöiti Trainingsrundi gschtartet. Am Nami isch Speer u Chugu ufem Programm gschtange. Siehe da, o Bigler hets mau vom Bike ufe Sportplatz gschafft u het bi üsem Programm mitgmacht, schön! Bevor mir aber mitem Schiesse losgleit hei, hets paar Medizinbauüebige gä. Nachem Chraft hei mir viu Speere chönne schiesse u vode Tipps und Tricks vo Blacky, Gabi u Ueli chönne profitiere. Bim Chügele isches bsungersch luschtig gsi, Blacky het üs der Dräihstoss zeigt. Churzentschlosse ha ig mi entschiede, dasi die Technick am LMM-Final wirde aawände…luegemer mau, ob das guet chunnt. Nachem Training simer nomau ga kneippe, Alisha, Marina u Vali si ganz dri u vor legendäre Brügg gumpet. Es sig doch gfährlich hei zwöi Spaziergänger gmeint… si hei sich aber nid la iischüchtere u si paar mau gumpet. Zum Znacht hets Hörndli mit Ghacketem gä u derzue Salat, Suppe u Dessert. När si d‘Spiuturnier witergange. Bigler u ig hei üsi Rundine souverän gwunne u sogar im grosse Finalissima gäge Blacky u Ueli im Dart abgruumt, Yeeee! Mit Stolz u Fröid gö Bigler u ig hüt ga liege, Blacky muess äue no es Beruehigungsspaziergängli ga machä… oh jee :)
Nadja Leuenberger
***
Dienstag, 18. Juli 2023
Programm: Hürden-ABC / Blockx-Koordination, Hürden / Nami frei
Hüt am Morgä het dr Weckär wie gwöhnläch am haubi 8i glütä, am achti hei mir üs ufä Wäg zum Zmorgä gmacht. Nachdäm mir üsäs Zmorgä gässä hei, si mir no einisch uf üsäs Zimmär u hei üs ready gmacht für z'Training. Aagfange het üses Training mitere chlinä Joggingeinheit u ämnä Louf-ABC am St. Moritzersee. Nachdäm mir üs bimänä Bänkli no chli dehnät hei, si mir zrügg zum Sportplatz gloffä u hei dert üsäs Training fortgsetzt. Hüt si wiedär einisch Hürdä ufäm Programm gstangä.
Bevor mir abär übär d'Hürdä gsprintät si, hei mir no äs Hürdä-ABC gmacht. När hei mir mitämnä churzä 5er gstartät. Aschliessänd hei mir ä churzä 3er gmacht u si uf di erschti Hürdä usem Startpflock gstartät. Nachämnä längä 5er u ämnä normalä 3er isch üsäs Training o scho wiedär dürä gsi. Äs paar vo üs si no ga kneippä u anschliessänd ga üsäs Zmittag choufä. D'Nina, Valerie, Marina u Alisha hei ihräs Zmittag scho am Morgä kouft, wüu sie hei wöuä äs Reisli mitäm Zug machä. Mir angärä si üsäs Zmittag am Lej Marsch ga gniessä. Z'Badä het üs abär nid so gluschtät, wüu d'Sunnä nid so isch fürä cho. Drum si mir när bi Zytä u pünktläch voräm Rägä wiedär zrügg i d'Jugi u hei üs chli usgrueht. Üser Zugfahrer hättä eigäntläch bis uf Chur wöuä, si dert abär leidär nid acho. Ds Bärgchärtli, wo mir hei übärcho, isch nid so wie aui dänkt hei bis uf Chur güutig gsi. Drum heisi endär müessä usstiegä u wiedär zrügg fahrä. Wo o sie ir Jugi si acho, hei mir immär no chli Zyt zum Znacht gha. Die hei di meischtä mit schlafä odär am Handy si verbracht. Am 7nii hei mir üs aui am Salatbuffet u am feinä Gmüescurry mit Poulet u Riis bedient. Zum Dessert hets äs feins Caramelchöpfli gä. Där Räscht vom Abä hei mir mit Spieli verbracht, abär de ja nid zlang! Morn am Morgä müessä mir nämläch früeh uf für ä Rundi Yoga am Stazersee.
Yara Schneider
***
Fotogallery 19.7.23 / Video 1 / Video 2
Mittwoch, 19. Juli 2023
Programm: Yoga am Stazersee (6.30 Uhr) / Einlaufen / Seilsprungzirkel / Koordinationsleiter / -läufe / Sprungschule, Kugel
Hüt am Morge het üse Wecker scho am 5.50 glüte. Mir hei üs parat gmacht und si am 6.10 mit dä Velos a Stazersee gfahre. Dert het ä Yogalehrerin uf üs gwartet. Zämä hei mr de ä Stung Yoga gmacht und äs paar si anschliessend no iz Seeli ä Morgeschwumm ga nä. Zrügg ir Jugi hets de äs feins Zmorge gä. Üses Training isch wätterbedingt vom 9.30 uf di 11i verschobe worde. Di Verschiebig het säch glohnt, wüu mir hei de am 11i mit strahlendem Wätter üses Training gstartet. Aus erst hei mr ä Selisprungzirku gmacht und plötzlech hei mir äs bekannts Gsicht uf dr Alag gseh und d Renate isch uf em Trainingsplatz gstange und het bi üs äs Bsüechli gmacht. Witer hei mr Üebige a dr Koordinationsleitere gmacht und Gabi het säch wider mau ä cooli Sprungüebig überleit wo mr zu Musig hei chönne mache.
Aschliessend hets Koordinationsläufe gäh und de no Sprungschule ir Kombination mit Chugustosse.
Nach em Training si mr de a See ga ässä, doch glii hei mr de o scho wider vom Rägä müesse flüchte. Am nami hei mr de no chli uf dr Massagematte entspannt, äs paar hei gschlafe, hei Spili gspiut oder si ga spaziere Zum Znacht hets de Härdöpfustock und Fleischvögu gäh, was wi immer sehr fein isch gsi. Nachem Znacht hei mr de no viu Spili gspiut und o di letschte Finäu vom Spiuturnier si no entschide worde.
Lia Leibundgut
***
Donnerstag, 20. Juli 2023
Programm: Medizinball / Hürden-ABC / Hürden / Nami: Volley/Rugby, Tempoläufe / Langhürden
Hüt isch scho der letscht Tag, wo zwöi Trainings ufem Programm stöh. Hei geits aber glich no grad nid. Wie meistens, het am 07.40 üse Wecker glütet. Am 08.00 simer ga Zmorge ässe. Nach däm mir üse Buch gfüut hei, isch no chli Zyt blibe, für ids Bett ds lige, bevor mir üs für ds Training parat gmacht hei. Am 09.30 isches de ufem Sportplatz unger witer gange. Ds Training ahgfange hei mir mit Jogge. Nach däm simer zum Chraft cho, wo mir verschiedeni Üebige mit de Medizinbäu gmacht hei. Für üs ufd Hürde vordsbereite, wo ufem Programm gstange si, hets es Hürde-ABC gä. Für die ahstehende Steigerigslöif si d Naguschue gsetzt worde. Füre Ahfang vom Hürdetraining hets e churze 5-er u 3-er gä. Unger angerem isch o uf die ersti Hürde gstartet worde. Ds Houptprogramm vom Hürdetraining isch us 5 × 6 Hürde bestange, wo ds Ziu isch gsy, Schnäuigkeit ds trainiere u Frequenz ds loufe. Bi de letschte zwöi Löif hets de o d Nina souverän im 3-er düre gschafft:)) Scho isch ds erste Training wieder fertig gsy. Nachem Usloufe u Kneipe isch Zmittag ässe am St.Moritzersee ahgseit gsy. I dene vier Stung Pouse si paar Spili gspiut worde, ds Massagemätteli isch o brucht worde u angeri hei die Pouse gnützt zum Schlafe.
Am 16.00 si wieder aui parat ufem Sportplatz gstange für ds letschte Namitraining. Ds Ihloufe isch dasmau spielerisch gmacht worde. Mir hei Volleybau u Eierlege gspiut. Nachem eher ruhige Volleymatch, isches zum Eierlege cho, wo mit vouem Körperisatz gspiut worde isch. Zum Glück si aui unverletzt blibe. Ds Programm vom Nami si Länghürde oder Tempolöif gsy. Bevors hei isch gange für ga ds Dusche, simer no ga kneipe. Aui hei sech scho der ganz Tag ufds Znacht gfröit. Mir si nähmlech ir Sunne ga Pizza ässe! Nach däms ono Dessert het gä (Nutellapizza u feini Coups:)), simer aui zämme zrügg id Jugi gloffe u hei üs bettfertig gmacht. Der Tag isch aber unerwartet no nid fertig gsy. Wo mir scho aui im Bett si gläge, isch plötzlech ä Alarm los u paar Minute speter het me d Führwehr ghöre Richtig Jugi fahre. Res (eine wo sech het usem Zimmer bschlosse woner uf ds WC het wöue) het scho Angst gha, dass är der Alarm usglöst het, wüu er äre Notfaunummere aglüte het, wüu d Rezeption scho zue gha het. Aber es isch zum Glück nume ä Fäualarm gsy im Hotel näbe der Jugi. Res isch ömu näre wieder i sis Zimmer iche cho u mir hei nach dem Fäualarm ändlech chönne ga schlafe.
Emily Lüthi
***
Freitag, 21. Juli 2023
Programm: Hürden-Gymnastik / Sprintserie / Langhürden / Nami frei
Hüt am morge isch dr Party-Wecker for Nadja wie immer am haubi 8i ab Gange . Na dis na hei sich auii parat gmacht zum ga zmörgele . Näre simer wie jede morge uf si 8i ga Zmorge ässe u hei üs aschliesend no fertig parat gmacht für s letschte Training az träte. Am haubi 10i het üses Abschluss Training gestartet . Zersch simer e chli am See hingere jogget und hei üs näre chli dehnet u no chli louf abc gmacht befor mit näre wieder zrüg zum Sport Platz si jogget. U näre hets grad afa rägne u de hei mir üses züg zämme packt u heis i materialrum gsteut. Es het nid wöue ufhöre rägne u de hei mir no paar üebige mit de Hürde gmacht zum ufwerme . Nach em ufwerme hei mir 2x50m steigerigslöif gmacht näre hets Sprintserie gä 2x 4x50m ds isch sehr asträngend gsi u zum Abschluss hets no 5 löif über ~200m Hürde oder Flach gä mit jewius 8min pouse zwüsche inne . Aso Mini bei möge nüme . Nach em Letschte Training si mir auii ga zmittag ichoufe is Coop oder i lidl , es pari si näre no ga kneippe i St.Moritzer See und näre hei mir auii üses zmittag im grupperum ir juggi gnosse , s letschte mau auii zämme zmittag gässe .
Nach em ässe het sich üses Zimmer für ne warmi duschi z nä entschiede und no z packe wüeu mir morn ja scho d heireis aträtte. Öpe am 2 hei sech ig und nina uf e wäg zum Polo-Turnier gmacht es het grad afa rägne u mir hei e chline Schirm gha u si näre chli nass gsi wo mir si acho . Es isch mega spannend gsi zum zue luege und es het es paar schöni föteli gä . Es pari si Id Badi Gange u angeri hei sich s ir Jugi gmüetlech gmacht und hei es spiu gspiut. Näre hei mirs üs no chli im Zimmer gmüetlech gmacht bis es znacht het gä. Zum znacht hets Suppe oder Salate vom buffet gä und Gemüseschnitzel* oder Paniertes Schnitzel mit Pommes frites u Erbsli und no es Aprikose sorbet. Ds isch mega fein gsi. Mir hei dr letscht Abe la us klinge la i däm mir no chli s Mätteli hei beleit und chli mitenang glachet und Liechtathletik Luzern im Fernsehzimmer gluegt hei. U näre wo mir ou scho ga schlafe und hei di letschti Nacht in St.Moritz verbracht .
Marina-Nina Minder
***
Fotogallery 22.7.23 / Video 1 / Video 2
Samstag 22.7.23
Programm: Verladen / Heimreise
6:30 Uhr hets glütet u churz drufabe bi ig mit packte Täschi zum Bus gange. Sache vom Ufenthaltsrümli ha ig o grad verlade u so isch üses Züg u Velo zvorderts im Anhänger verstouet gsi. Bim Zmorge hei mir üs gsterkt u no einisch so richtig zuegschlage. De so Chäs u Wurscht isch äbe de scho fein… Da am Vorabe no chli wäg dr Zyt isch ghändelet worde, sie gwüssi ersch uf die 7:45 Uhr cho zmörgele, aber sie hei grad ihres Bagasch mitbrunge u so ha ig mit fliessigei Helfer chönne wiiterlade u so si bereits am 8:15 Uhr aui vorem volle Anhänger gstange u mir si startklar gsi. De Tschüss, bis gly u weg si mir gsi! Genau 8.30 Uhr hei mir das St. Moritz verlah u Kurs is Ämmital gnoh.
Brumm, Brumm, Brumm... u dä Julierpass isch vom Opeli gmeischteret gsi u jetz si Brämse gfragt gsi. Churz vor Tiefenkastel hets du o dr erscht Halt gä, wüu es Säckli isch verlangt worde. Aber es isch zum Glück nume Fehlalarm gsi u wiier isches gange. Es WC isch du gly drufabe agstüüret worde u mit eme breite Lächle isches när ume witer. Am Fuchsberg verbii u mir hei nid üse legendär McDonalds-Stopp gmacht?! Genau, de mir hei bessers verdient u so simer bis nach Litau düüset. Pünktlech am 12:00 Uhr simer bim "Hammer Highway Grill" üsne Büüch e mega, super feine Hamburger ga zueführe. Das Ässe isch "Hammer" gsi…. No es Stündli u de si mir 13:58 Uhr uf dr Kniematte vorgfahre u d'Eltere hei chum möge gwarte, um ihrer Kinder i Empfang z‘näh. Hie es Bike, da es Köfferli u scho gly isches fertig gsi u das Lager 2023 z’Änd.
Herrlech, top isches gsi u het riese Spass gmacht!!! 😊
Blacky
Das nächste Trainingslager St. Moritz findet vom 8. bis 20. Juli 2024 statt
