Trainingslager St. Moritz vom 7. bis 19. Juli 2025
09.07.2025
Der Sportklub Langnau absolviert vom 7. bis 19. Juli 2025 wiederum ein Höhentrainingslager in St. Moritz.
Montag, 7. Juli 2025
Hüt Morgä äm 8i z Langnou ischs losganäg, üsi Fahrt hei mr pünktläch gstartet. Mir hei üsi Route leider nid ganz planmässig chönnä fahrä, wegämä Umfau uf dr Stercki. So si mr statt am 12:30 Uhr, haut ersch 13:15 zum Zmittagässe cho. Ds Zmittag hets Salat vom Buffet und Cordon-Bleu mit Teigware u Gmües gã. Nächär hei mr scho grad üsi Zimmer chönnä bezieh u üs no chli chönnä irichtä.
16:30 Uhr het när üsäs erschtä Aaklimatisationstraining gstartet. Mir si ä Rundi dürä Wald jogged u hei no chli dehnet. Drufabä si no 1x 150 Meter, 2x 100 Meter u 2x 50 Meter ufem Programm gsi. Aber wius het agfangä rägne u luftä, hei mir nach dä 100er z'Training beendet u si it Jugi warm ga duschä. Am Abe hets Pizza mit Gmües gä. U när heimer dr Abe gmüetlich la usklinge.
Fabienne Flükiger
Fotogallery vom DI 8. Juli 2025
Dienstag, 8. Juli 2025
Hüt isch im Zimmer 107 am 7.40 Uhr dr Wecker gange. Wo mir usem Fänschter hei gluegt, si mir gra chli überrascht gsi, wüus ir Nacht bis uf Corviglia abe gschneit het. In St. Moritz säuber hets zum Glück ke Schnee gä. Am Achti si mir aui abe i üse Grupperum und hei äs feins Zmorge gässä. Am haubi 10ni hei mir de z'Morgetraining bi eher chüele Tämperature gstartet. Mir hei ä Seilsprungzirku gmacht und Sprüng ufem Rase. Zum Zmittag hei mir üses Pick-Nick i dr Jugi gässä. D'Zyt vor em nächste Training hei di Meischte uf em Massagemätteli oder i dä jewilige Zimmer verbrunge. Am vieri isches de witergange mit eme Therabandzirku und ere stränge Sprintserie. D Renate und dr Bigler hei z'Namitraining la usfaue und si uf Corviglia ga ä Schneemaa mache :)
Am Siebni hets de Risotto zum Znacht gä. Nach em Ässä hei mir no Teams für z Spiuturnier gmacht und o scho di erschte Spili gspiut. Am haubi 10ni si de di Meischte i iri Zimmer und de gli o ga schlafe.
Lia Leibundgut
Mittwoch, 9. Juli 2025
Mittwuch, der 9. Juli 2025, bedütet, es isch der 3. Tag vom Trainingslager ds St. Moritz. Am 8i simer wie jede Morge, pünktlech ga Zmorge ässe. Gstercht hei mir am haubi zähni üses Training uf der Rundbahn i Agriff gno. Losgange isches mitemne Minibandzirku, bevor mir üs mitemne Hürde-ABC spezifisch uf ds Hürdetraining hei vorbereitet. Ufem Plan si churzi 5er, 3er u anschliessend 1ner gstange, bevors zum Abschluss no 2 längi 5er het gä. U scho isch ds Training wieder verbi gsi. Nachem Kneippe heimer ir Jugi üses Zmittag gässe. Am haubi zwöi isch Abfahrt gsie für id Badi uf Pontresina. Dert heimer üse frei Nami mit Sprudle chönne gniesse u üs vo de Trainings erhole. Nachem Bade heimer d Zyt chli individuell verbrunge mit Spiele, Schlafe oder Regeneriere ide Boots oder ufem Mätteli. Ds Bade het natürlech Hunger gä, drum hei mir üs ufe Spaghetti-Plousch zum Znacht gfröit. Nachem Znacht isch nomau Spiele ufem Programm gstange, bevor aui müed u glücklech si ga schlafe.
Emily Lüthi
Danke Bio-Familia für das Müesli
Fotogallery vom DO 10. Juli 2025
Donnerstag, 10. Juli 2025
Am Donschtimorge hei mir üs aui zäme am 8i bim ne leckere Zmorge troffe. Es git immer e gueti u vieusitigi Uswau. Scho gli speter hets Training ufem Sportplatz agfange. Hüt isch Speer u Hochsprung ufem Program gschtange, zersch hei mir üs aber wie immer mit zwöi lockere Ründeli Jogging ufgwermt u si näre ad Koordinationsleitere gange. Nachem Iiwerme hei mir mit Hochsprung gschtartet u näre si mir ga Speerle. Nam Training si es paar no ga Kneippe u zäme am See ga Zmittag ässe. Name Zytli si mir när mit em Velo wieder zrügg id Jugi ga e Mittagspouse mache. Am 4i het z'Namittagstraining agfange. Zum Iiwerme hei mir d'Schuumstoffchlötzli brucht. Näre het scho die aasträngendi Sprintserie gstartet (3x 6x80m). Am 6i hei mirs düre gha. Zur Regeneration si mir no ga Kneippen, es paar vo üs si sogar inne gumpet. Zum Znacht hets Pommes mit Gschnätzlets gä. Nach em Znacht isch no zSpiuturnier witer gange u am 9i het no d Schwizer Frouenati ar EM gäge Finnland gspieut und dr Viertufinaliizug gschafft.
Nora Lehmann und Lina Wittwer
Freitag, 11. Juli 2025
Hüt het üse Tag e Stung früecher gstartet aus schüsch, nähmlech scho am 7ni. Mir hei üsi Velo‘s gnoh und si a Stazersee gfahre. Dert hei mir es Footing gmacht u si wider zrügg gfahre. Wie gwohnt hei mir nächhär Zmorge gässe. Am haubi 10ni het z Trening g’startet u mir hei üs i gwehrmt, dehnt und es paar Hürde Üebige gmacht. Wüu hüt isch nähmlech Langhürde ufem Treningsplan gstange. Nachem Trening si mir de ga Z‘Mittag choufe u hei ds entweder am See oder ir Jugi gässe.
Da am Nami ke Trening isch gsi, si paar ufe Piz Nair chli d’Ussicht ga gniesse. Anderi si ga spaziere oder hei sech ir Jugi chli entspannt.
Zum Znacht hei mir Couscous mit Linseplätzli gässe. Zum de Tag z beände si no flissig Spili gspiuut worde. Näbe bi isch no Diamond League Meeting vo Monaco gloffe. So si ner aui z fride ga schlafe.
Sara Frauchiger
Samstag, 12. Juli 2025
Hüt am Morge hets wie geng am achti Zmorge gäh. När si mir am 9:30 ufem Sportplatz gstange, u hei üs mit eire lockere Rundi iigwermt. Nächhär hei mir mitem Blacky es paar Iiwermüebige gmacht u när no e Therabandzirku. Bevor mir hei Stigsprüng überd Hürde gmacht, hei mir no chli Sprungschuu uf dr Bahn gmacht. Nach paar Sprüng i Sand si di meiste no gah kneipe u hei sech när ihres Zmittag im Coop gchouft. Ir vierstündige Mittagspouse hei dr Blacky u d Merve es Tennisduell gspiut u dr Räscht isch sech im Zimmer gah entspanne. Am vieri isches witergange mitem nächste Training. Äs si Sprintstarts u Hüetlifrequenz ufem Programm gstange. Zum Iiwerme si mir ume ei Rundi ga jogge, u hei när gad mitem Louf-ABC gstartet. Nachdäm mir d Hüetlifrequenz hei gmacht, hei mir no Sprintstarts gmacht u när isch ds Training ou scho verbi gsih. Äs paar wenigi si trotz em chaute Luft no gah kneipe u när hets Znacht ir Jugi gäh. Die wo hei wöuue si när no ufe Mouttas Muragl gange u hei dert die schöni Ussicht chönne gniesse. U mit ere Nutellapizza ir Sunne hei mir dä schön Tag lah usklinge.
Elina Schwarz und Merve Ozcan
Sonntag, 13. Juli 2025
O am Sunntig isch nid nume grueht worde u es isch am Morge mitem Training witer gange. Hürde u Sprint isch ufem Programm gsi. Bi richtigem Aprilwätter heimer üsi letschti Einheit vor Wuche suber düre zoge. Leider hei üs när die wo nume ei Wuche si cho scho müesse verlah u ufe Zug Richtig Hei gah.
Zum Zmittag simer zäme id Sunne ga e feini Pizza gniesse. U när isches am Namitag um d Regeneration gange. Die meischte hei gluegt was ir Heimat louft u si flissig am Schwingfescht verfouge gsi. I gloube dr richtig het dert gwunne ;)
Mit paar nöie Gescht zäme heimer am Abe no gmüetlech zäme znacht gässe ( Härdöpfugratin mit Falaffel oder Poulet. Gemäss Jelena u Mina es 7/10) u hei no die abendleche Dartsduell düre gfüehrt. Mir fröie üs uf die zwöiti Wuche!
Valentin Mürner
Montag, 14. Juli 2025
Am 8te Tag vom Trainingslager in St.Moritz heimer aui im Training wieder gschwitzt, aber bevor mir gnöier uf ds chöi ihgah, heimer so wie immer äs fröidigs Zmorge gha. Leider het dr Wätterfrosch üs ds schöne Wetter nid la ha. Ufem Plan isch ä Seilsprungzirku, Widerstandslöif und Chugu gstange, was de oh trotz Räge schnäu isch vrbi gange. Ds zMittag si mir im Coop gah ihchoufe, ungerwegs mitem Velo, das mir nid müesse loufe. Äs paar hei Kidneybohne gnoh, hoffe mir das si nid wärde dr Schisser übrcho. Nach einige Dartturnier sie die Meiste gah schlafe, d Mehrheit ohni z schnarchle. Im Namittagstrainings isch fliessig Gstäbelet, Ghochsprüngelet und Gsperrlet worde, das mau het üs ds Wätter die gueti Luune nid vrdorbe. Nachem Kneippe si aui früsch duschet zum Znacht und hei nachdäm vrschiednigi Spiele voubracht, hiemit säge mir guet Nacht!
Mina Hirsbrunner und Jelena Schranz
Dienstag, 15. Juli 2025
Wo mir hüt morge si ufgwachet, het ar Nadja scho d Sunne ah Chopf gschune. Das het üs positiv für dä Tag ihgstimmt. Zmorge isch wie immer tiptop gsi. Im Training heimer zum Ihwärme Hürde-ABC gmacht und ahschliessend ghürdelt, so wie gsprintet und einigi hei no äs Langhürdetraining absolviert. Als Cool-down sie mir itz chaute Wasser ga bädele. Hüt am Nami hei mr frei gha. Es paar vo üs si am Seeli gsi angeri si no chli ga spaziere oder mitem Bändli ufe Bärg, dert he mr Murmeli gseh. Zum Znacht het es Curry gä. Natürlech hei mir no gspiut (I ha bim Jasse gwunne ;)).
von Hanna Hirsbrunner
Mittwoch 16. Juli 2025
Ä Stung früecher aus schüsch het üs der Wecker hüt Morge usem Töifschlaf glütte - Foote steit hüt ufem Programm! Haub motiviert si mir mit üsne Velos der Stutz deruf richtig Stazersee gfahre. Dert acho isches nid lang gange, si die erschte scho im Wasser gsi. Nid grad warmi Tämperature hei mir während üsem Schwumm gha u glich hei sich aui trouet äs Schwümmli ga ds nä.
Nachem wouverdiente Zmorge hets scho die erschti Dartrundi gä. Rum und Ehre isch der Lohn gsi. Abgsackt het das natürlech wieder mau Bigler.
Nachem Zmorge isches scho richtig Sportplatz gange. Nach zwöine Rundine iiloufe hets ä Minibandzirku gä. Wüu mir nach däm Zirku heiss für me si gsi, hei mir äs Zuesatztänzli igstudiert - mit Erfoug :)
Nachem Louf-ABC u vielne Hürdesprüng hets zum Abschluss vom Morgetraining no ä Sprintserie gä u när isches ab ids verdiente Kneippe gange. Ds Zmittag hei mir am St. Moritz-See verbracht.
Am Nami isch für einigi packe ufem Programm gstange, angeri inklusive mir hei Siesta gmacht.
Ds Namitraining isch vou mit Würf gsi - Speer u Chugustosse hei mir ufem Programm gha. Zersch hei mir aber äs Iloufe à la Blacky gha, wo sehr luschtig u motivierend isch gsi :) Näbscht amne schmärzende Chiefer si ömu aui heil vom Medizinbau-Iwerme zrügg cho.
Wie gehabt hets nachem Namitraining nomau äs Kneippe gä u de isch scho Zit fürs Znacht gsi. D'Hörndli mit Ghacketem si sehr fein gsi u hei viu Energie gä fürnes witters Dartduell. Mit Freude hani das gäge Bigler, Renä u Valentin für mi chönne entscheide! Nach däm Erfoug hei sech Blacky u ig no gäge Mina u Jelena imne Spike-Ball bewiesä... Nacheme spannende Match hei mir das Spiu für üs chönne entscheide - Yuhuuuuu
Mit hochgehobenen Händen isches du am spetere Abe ids Bett gange, ab ga schlafe!
von Nadja Leuenberger
Donnerstag, 17. Juli 2025
Hüt am Morge am haubi achti het üse Wecker glüte u mir hei üs parat gmacht für ga z‘Morge z'ässe. Nachem feine z‘Morge hei mir üs fertig gmacht fürz Training. Zum warm wärde hei mir zersch zwöi lockeri Rundeli uf der Bahn gseklet. Aschliessend hei mir chli dehnet u sprungspezifisches Lauf-ABC gmacht. Wärend aui angere am trainiere si gsi, hei d'Mina u d'Jelena z'Iloufe für at EYOF (European Youth Olympic Festival) einisch provisorisch düregspiut, da si nächst Wuche der chöi starte. Der Räschte vor Gruppe het entweder Stabhochsprung, Hochsprung oder Krafttraining gmacht. Zum Abschluss vo däm hütige Training si no Tempoläuf ufem Programm gstange. Aschliessend hei mir no usgloffe u si när no i Fluss vom St. Moritzer-See ga kneippe. Womer mit däm du si fertig gsi, hei mir üs ine Coop- und Lidl-Gruppe ufteilt für ga z‘Mittag z'choufe. Nachem Ichouf simer mitem Velo wieder i d'Jugendherberge gfahre, womer üs de o ume troffe hei u zäme z‘Mittag gässe hei. När isches scho so wit gsi, üsne EYOF-Starterinne u am Gabi tschüss z'säge.
Nachem z‘Mittag simer üs de no hurti chli itz Zimmer ga erhole. Am vieri hei mir üs de aber scho ume troffe für nes Apèro am Statzersee ga z'gniesse. Es paar si när no i See ga bädele u när simer gmüetlich zum z‘Nacht ume zrugggfahre. Zum z‘Nacht hets Cordonbleu mit Härdöpfusalar gä. Wäretem Znacht hei mir flissig d'Hanna agfüret, wo am Usscheidigsrenne für at
U20 EM in Zofingen 400m Hürde isch gloffe. Mitere Zit vo 60.09 Sekunde het sie sech söuverän ufem dritte Platz platziert.
Nachem Znacht hei ig u d Nadja gäge Bigler u Renate zwe Rundine Spikeball gspiut u souverän gwunne. Anschliessend simer du i Zimmer gange u si när ei Chehr ga schlafe. Es isch ufz Neue e super Tag gsi.
von Alisha Schafroth
Freitag, 18. Juli 2025
Hüt am Morge het üse letscht Tag gstartet, u das grad mit Foote am Stazersee. Nachem erfrüschende Bad hei mir wie immer Zmorge gässä u üs när ready füre Tag gmacht.
Acho im Training hei mir üs mit zwöi lockere Rundine u amene Seilsprungzirku igwermt u äs anschliessends Hürde-ABC gmacht.
Äs paar vo üs hei när mit Hürde witergfahre, die angere si zum Stabhochsprung gange. Ufem Hürdeprogramm si 1er, 5er u när Langhürde (200m u 400m Distanz) mit 6 bzw. 3 Hürde gstange. Nachem kneippe hei mir Zmittag ikouft u si üs id Jugi ga parat mache für a Lej Marsch. Dert hei mir üses Zmittag gässä u dr letzt Nami no chli gnosse, bevor mir zurügg zur Jugi si u packt hei. Äs paar si mit de Velos no ga Kaiserschmarren ässe, bevors de Znacht het gä. Kalbsbratwurst oder Cevapcici mit Härdöpfuschnitze.
Dr Abe hei mir mit Spieli spiele u Fuessbau luege la usklinge.
von Yara Schneider
Samstag, 19. Juli 2025
Zit im schöne Engadin isch sehr schnäu verby gange u so isch hüt scho dr Abreisetag ufem Programm gstange. Blacky het ds Lade vom Bös beschtens im Griff gha u so isch d Reis zrügg is Ämmitau pünktlech gstartet. Bim Hammer Highwaygrill ds Luzern hets um di Zwöufe dr Mittagshaut gäh. Zur gliche Zit hei Eglis ds Landquart dr Outlet fasch uskouft u Bigler u i hei uf Diavolezza no ä Röschti mit Späck u Spiegelei gnosse.
Aui sy schlussändlech guet hei cho!
Äs isch schön ds gseh, wie ds Lagerläbe wie jedes Jahr iiwandfrei funktioniert het. D Athlete hei super trainiert, ds Wätter isch meischtens ideau gsi für ds Training, di obligate Velotoure sy ohni Zwüschefäu über d Bühni u äs sy wieder etlächi Gschichte gschribe worde, wo mä säch no i näs paar Johr gärn zrügg erinneret.
Danke Gabi, Blacky, Margrit u Ueli, dass dir das immer müglech machit. Äs het gfägt.
von Renate Leuenberger
Das nächste Trainingslager St. Moritz findet vom 5. bis 15. Juli 2025 statt
