Trainingslager St. Moritz vom 5. bis 15. Juli 2026

Schwarz Gabi 07.07.2026

TRAININGSLAGER ST. MORITZ
vom 5. bis 15. Juli 2026

***

Fotogallery 5.7.26 / Insta-Reel 5.7.26

Sonntag, 5. Juli 2026

Scho wieder isch es Jährli ume u z'Trainingslager St. Moritz steit vor dr Tür. Pünktlich am 8ti simer mitem Bus z'Langnou abgfahre. Hanna, Mina, Emma, Elina u Sara hei dr Zug gno. Bi KS-Sport in Siebnen hei mir e churze Zwüschehaut gmacht, um zbsteute Sportmaterial (Medizinbäll und Stäb) abzhole. Süsch heimer ussert e WC-Boxestopp nie stiu gha u hei rächt e churzwiligi Fahrt gha. Dr Bus het mitem schwäre Anhänger chum dr Julier uechemöge, aber zum Glück isches ohni zStosse gange u äneache heter sich wieder erhout u mir si am haubi eis ir Jugi iitroffe. Dert hei beireits Renate u Bigler uf üs gwartet. Die, wo mit ÖV si aagreiset, si de o gly drufache iitroffe, so dass mir grad hei chönne ga Zmittag ässe. Es het Gschnätzlets mit Teigware u Salat gä. Mir hei de när no bis am drü müesse usharre, bis mir Zimmer hei chönne bezieh. ZWarte het sich aber glohnt: Mir si im 1. Stock!!!

Uf die füfi simer de zu üsem Akklimatisationstraining gstartet. Es het es Duurlöifli zur Sportaalag füre gä, womer moblisiert u dehnet hei. Bir Jugi obe hets när no 6x 100 Meter liecht stiegendi Steigerigslöif gä. Jelena und Amira hei Stabiüebige gmacht. Das Training isch e gäbige IIstieg i üses 10-tägige Höhetraining gsi. Am siebni simer de ga Znachtässe. Ir Chuchi ischme liecht überforderet gsi, da sehr viu Lüt glichzityg hei wöue ässe. Es het Pouletflügeli mit Pommes gä u derzue "grossi" Salatteller! Nam Znacht heimer no dSpiuteams usgloset u när si scho die erschte Spieli gspiut worde.

Gabi Schwarz

***

Fotogallery 6.7.26 / Insta-Reel 6.7.26

Montag, 6. Juli 2026

Am zwöite Tag vo üsem Trainingslager hei mir ä Trainingstag mit zwöi Trainings ufem Plan gha. Für das hei mir üs am Zmorgebuffet gstercht, bevor mir üs ready für z Training hei gmacht. Am haubi 10i hei mir üs ufem Sportplatz troffe u igwermt. Ds Mobilisiere u Dehne het hüt d Hanna gleitet. Aschliessend hei mir ä Therabandzirku gmacht, bevor mir 3x 60m gsteigerät hei. Nachemne Sprung-ABC si no mehrmaus 60m Loufsprüng ufem Programm gsi.

Ds Training abgschlosse hei mir mit Kneippe. Üses Zmittag hei mir när am St. Moritzersee gnosse u si üs aschliessend ide Zimmer ga erhole für z Namittagtraining.

Am Nami si Löif ufem Programm gsi: 4×50m, 5×60m, 4x80m, 2x100m u 2x50m

Nachem usloufe si mir ga kneippe u äs paar o ga bade.

Zum Znacht hets Chili sin carne mit Ris gä. La usklinge hei mir dr Abe bi Spiu und Spass mit diverse Spieli.

Yara Schneider und Alisha Schafroth

***

Fotogallery 7.7.26 / Insta-Reel 7.7.26

Dienstag, 7. Juli 2026

Üse tag 3 het mit drü lute Weckere gstartet.

Bevor mir üs parat für ds hütige training hei gmacht, hei mir üs no mitem ne feine Zmorge gstercht. Hüt isch nume es Morgetraining ufem Programm gstange. Gstartet hei mir ds Training wie immer mit zwöi lockere Ründeli jogge. När hei mir üs dehnet u es paar Schwungüebige gmacht, wo üs ufds ahschliessende hürdele vorbereitet het. Nachem hürde abc hei mir näre afa hürdele. Zersch hei mir no mitemne lockere 5er gstartet, bevor mir Starts uf die ersti Hürde hei güebt. Nächhär hei mir no mehreri 3er u längi 5er gmacht.

Ahschliessend si mir gah usloufe u gah kneippe. Wüu mir när am Lei Marsch hei wöue gah grilliere, si mir no ids coop gah Fleisch, Grillchäs u Gmües choufe.

Am lei marsch hei mir üse frei nami mit bade, sünnele u Uno spile verbrunge.

Am 7ni hets när no Znacht gäh u när hei mir no mit üsem Spieuturnier witergfahre. Nach däm sunnige Tag si mir auui zfride gah schlafe.

Emma Hirsbrunner und Merve Özcan

***

Fotogallery 8.7.26 / Insta-Reel 8.7.26

Mittwoch, 8. Juli 2026

liebs tagebuech,

früsch us üsne tröim entsprunge, heimer z zmorge abegschlunge. nachem readymache mit em tööf uf d aalag ache brummet u scho gly drufabe het dr blacky sini awisige ache gsummet . nachem iiwerme heimr paar speere gschosse u d emma het no paar mau gnosse. hirsbrunner mitem extra training fre grossalass, di angere bim hochsprung nid vrpasst. paar gueti sprüng über d hochsprung latte u nere zum abchüele e schwumm im chaute. zum zmittag heimr z motto lidl lohnt sech gwäut, das heimr am see gesse es het a nütem gfäut. d mittagspouse heimr aui ungerschidlech vrschwitzt u scho simr ide trainingschleidr a staazersee gflitzt. fr di meiste si tempoleuf ufem programm gstange u di angere si chli i chraftrum ga hange. mit thai curry im buch simr itze das tagebuech am schriibe, mir hoffe mir hei euch öii zyt chönne vrtriibe:)

Jelena Schranz und Valerie Lempen

***

Fotogallery 9.7.26 / Insta-Reel 9.7.26

Donnerstag, 9. Juli 2026

Hüt Morge isch ds Footing im Stazersee ufem Programm gstange. Mir hei üs am 7ni vor dr Jugi versammlet, si ueche gvelölet u si när gah bade. Nächhär hei mir im Zmorgebuffet grosszügig zuegschlage u am haubi 10ni het när ds Training ahgfange. Zersch hei mir e Minibandzirkel absolviert u nachem ahschliessende Hürde-ABC hei mir de mit de verschidene Hürderhythmusüebige witergfahre. När hei mir no zwöi Mau vier Hürde ir Wettkampfdistanz vo 400m Hürde ih Agriff gnoh.

Nach dere Trainingseinheit si mir no gah kneippe, üses Zmittag gah ichoufe u när isch d Mehrheit vo üsere Gruppe zum Lej Marsch uechegfahre. Dert hei mir grillet und üse frei Nami mit bade, sünnele u UNO spile verbrunge. Die Angere si ds Zmittag ir Jugi gah verspiese u speter no ufe Piz Nair die schöni Ussicht gah gniesse. Nachem feine Znacht si no schöni Bluemestrüüs pflückt worde u so si mir när zfride ga schlafe.

Elina Schwarz und Sara Frauchiger

***

Fotogallery 10.7.26 / Insta-Reel 10.7.26

Freitag, 10. Juli 2026

Hüt hei mir dr Tag mit eme Zmorge agfange. Nachhär si mir uf d Sportalag gange. Zersch hei mir üs iigloufe, mobilisiert u gstreckt. Nachhär hei mir Wiitsprung u Chugustosse trainiert. Zum Schluss si mir no locker usgloufe u sie gah knippen.

Am Mittag hei mir e Pause gha u hei üs chönne usrue.

Am Namittag si mir wider uf d Sportalag gange. Dert hei mir üs nomau iigloufe u mobilisiert. Nachhär hei mir s Lauf-ABC mit em Gummizug gmacht u d’Startabläuf güebt. Zum Schluss si mir usgloufe, hei üs gstreckt u wider sie wider gah kneippen.

Amira Wüthrich und Kim Muster

***

Fotogallery 11.7.26 / Insta-Reel 11.7.26

Samstag, 11. Juli 2026

Am Morge si mir ohni Sorge zum Zmorge. Früsch gstärkt u ab dr Blitz dür d Blocks düre gflitzt. Hürde ABC und Hürdelöif isch z Programm gsi u drufabe si mir im Fluss und im Coop vrbi. Zmittag hei mir am Seeli gnosse u z Badzüg id Täsche gschosse. Am Nami si mir id Bade gah sprüdele und sounäle. Früsch erholt hei mir zum Znacht Gnocchi Gratin gha und nachdem si mir no ufe Muattas Muragl zum Sonneungergang, Hurra!

Mina und Hanna Hirsbrunner

***

Fotogallery 12.7.26 / Insta-Reel 12.7.26

Sonntag, 12. Juli 2026

D Familie Schwarz het hüt Morge früech dr Wecker gsteut u isch is Kerpinski dr WM Match Argentinie gäge d Schwiz go luege. D Linwand sig riesig gsi u d Getränk eher tüür. Leider isch dä Match verlore gange u d Schwizer sy us däm WM-Turnier usgschide. Äs isch grad aune gläge cho, dass ds Zmorge ersch uf di haubi nüni isch agsetzt gsi. D Mina und Hanna hei hüt ä Wettkampfsimulation gmacht u sy vo dä Trainigsgspändli lutstarch agfüüret worde. När isch scho Zit gsi, für d Mina ds versbschiede u ihre viu Glück für d EM in Rieti ds wünsche. Ds Training isch mit Stabhochsprung, Hochsprung, Speer u Kugelstosse witergange. Dr Nami hei deu am Seeli verbrocht u angeri hei chli nochegschlofe. Uf Initiative vo Vali sy mir hüt Abe i d Sunne go Pizza ässe. Dert isch d Anja drzue gstosse. Nachem feine Ässe isch no chli gspiut worde u öbis nach dä eufe sy aui schön im Hulli gsi.

Renate Leuenberger

***